Nasakpan sa Chhatrapati Shivaji Maharaj International Airport ang usa ka pasahero gikan sa Thailand nga adunay dala nga 16 ka buhi nga mga bitin nga gisulod sa iyang bagahe.
Ang mga bitin sama sa garter snake, California king snake, rhino rat snake, ug Kenyan sand boa, kasagaran makita sa pet trade ug wala’y peligro sa tawo.
Gidakop ang pasahero ug padayon ang imbestigasyon.
Gipost sa social media ang mga litrato sa mga bitin isip ebidensya.
Dili kini unang higayon nga dunay nasakpan sa maong airport tungod sa wildlife smuggling.
Niadtong Pebrero, usa usab ka pasahero ang nasikop nga nagdala og lima ka endangered nga Siamang gibbons, ug sa Nobyembre sa miaging tuig, dinosena ka mga pagong ang nakumpiska.
Matod sa grupo nga TRAFFIC, misaka ang kaso sa wildlife smuggling gikan Thailand paingon India tungod sa taas nga demand sa exotic pets.
Kapin 7,000 ka hayop ang nakumpiska sa sulod sa 3.5 ka tuig, 80% niini nadakpan sa India.
Pahimangno sa mga otoridad, hugot nga bawal ang iligal nga pagbaligya ug pagtransport sa wildlife species, ug ang mga malapas sa balaod magaatubang sa mabug-at nga silot.