Giingon sa House prosecution panel nga andam na kini sa pagpresentar sa sunod nga mga saksi ug ebidensya sa impeachment trial ni Vice President Sara Duterte, ilawom sa Article II nga naghisgot sa alegasyon sa unexplained wealth ug sayop nga deklarasyon sa SALN.
Matud ni House Prosecutor Terry Ridon, adunay su-od nga koneksyon si businessman Jaime T. Cruz sa pamilyang Duterte, nga kinahanglan susihon sa Senate Impeachment Court kalabot sa mga transaksyon sa GenCorp.
Sumala sa prosecution, 19 ka kontrata nga nagkantidad og kapin P33 milyon ang nakuha sa GenCorp gikan sa Davao City government diin matud ni Mayor Sebastian “Baste” Duterte wala siya kahibalo sa interes ni VP Sara sa maong kompanya. Gibutyag usab ni Ridon nga angay susihon ang testimonya ni kanhi Senador Antonio “Sonny” Trillanes base sa iyang ipadayag ug kung makalahutay kini sa cross-examination.
Gipahibalo usab sa prosecution nga andam silang mopresentar sa mga opisyal sa Land Registration Authority ug Anti-Money Laundering Council, ingon man kang Trillanes, sa pagpadayon sa pagdungog.