Upat ka suspetsado sa ilegal nga drugas, lakip ang usa ka High-Value Individual (HVI), ang nadakpan sa managlahing drug buy-bust operations nga gipahigayon sa kwerpo sa kapolisan sa Dakbayan sa Valencia ug lungsod sa Manolo Fortich, Bukidnon.
Sa taho nga nadawat sa Bombo Radyo gikan sa Bukidnon Police Provincial Office sa pamunoan ni Provincial Director PCOL Oliver Sotto Navales, unang nadakpan sa Purok 1, Barangay Poblacion, Dakbayan sa Valencia si alyas “Mario”, 49-anyos ug giisip nga HVI, kauban ang usa ka 36-anyos nga Street Level Individual (SLI). Nakuha gikan sa duha ang upat ka sachet sa gitoohang shabu nga motimbang og 10.2 ka gramo ug nagkantidad og ₱69,360.
Samtang sa gipahigayon nga operasyon sa Purok 10, Barangay Damilag, Manolo Fortich, nadakpan usab ang duha ka SLI nga sila alyas “Madam”, 44-anyos, ug alyas “Tatay”, 59-anyos, human nakuhaan og duha ka sachet sa shabu nga nagbalor og ₱3,944.
Sa kasamtangan, ang mga nadakpang suspetsado gipangbalhug na sa selda sa matag stasyon sa kapolisan samtang ginaandam na ang pormal nga kaso batok kanila kalabot sa paglapas sa Republic Act 9165 o Comprehensive Dangerous Drugs Act of 2002.