Mokabat na sa kapin 1,000 ka mga bata ang nakabsan sa kinabuhi samtang kapin sa 187,000 ang nagmasakit tungod sa gikonsiderar nga pinakagrabeng pag-ulbo sa sakit nga tigdas sa nasud sa Bangladesh.
Sa taho sa Bombo Radyo ug subay sa datos gikan sa US Centers for Disease Control and Prevention (CDC), nag-ugat ang maong krisis sa kanihit sa suplay sa bakuna tungod sa pagbag-o sa mga patakaran ug kagubot sa politika sa maong nasud sa nakalabayng mga tuig. Bisan pa sa gipahigayong emergency vaccination drive, gibantayan nga aduna pa gihapoy dul-an upat ka milyon ka mga bata ang wala pa napanalipdan batok sa maong sakit.
Samtang, naglisud usab ang mga tambalanan sa Bangladesh tungod sa dungan nga pagsaka sa kaso sa dengue, samtang nagpadayon ang paglibot sa mga health team aron bakunahan ang ubang mga bata aron malikayan ang dugang nga pagdako sa gidaghanon sa mga biktima.