Arestado ang duha ka lalaki atol sa entrapment operation batok sa iligal nga pagbaligya ug pag-apod-apod og produktong petrolyo sa Purok 13, Barangay Bonbonon, Iligan City, alas 1:38 sa hapon niadtong milabay’ng adlaw.
Ang operasyon gipahigayon sa CIDG Iligan City Field Unit, CIDG Regional Field Unit 10-RSOT ug Iligan City Police Office Station 6 ubos sa OPLAN OLEA.
Ang mga nadakpan usa ka 18-anyos nga giila sa alyas “Austin” ug usa ka 17-anyos nga lalaki. Samtang, wala pa madakpi ang tag-iya sa establisemento.
Nasakmit usab ang kapin 2,700 ka litro nga gituohang gasolina nga nagkantidad og P1,200,820, lakip ang makina sa pagpamaligya nga adunay tulo ka nozzle ug P200 nga gigamit isip buy-bust money.
Giatubang sa duha ang kasong paglapas sa BP 33, nga giamendaran sa PD 1865, ug gipailalom sa inquest proceedings sa City Prosecutor’s Office sa Iligan City.