Nakuha ang atensyon sa 48,000 ka bisita sa usa ka museo sa Netherlands human sa usa ka talagsaong artwork nga gibuhat gamit ang 390 ka kilo nga peanut butter.
Sulod sa duha ka bulan, gipakita kini sa Boijmans van Beuningen Museum sa Rotterdam isip pagpasidungog sa artist nga si Wim T. Schippers, nga namatay ning tuiga.
Gipahid ang peanut butter sa hexagonal nga salog nga adunay gilapdon nga 25 square meters, subay sa instruksyon sa artist nga himuong hapsay kutob sa mahimo ug walay mga bukol.
Sa pagtapos sa eksibisyon, gi-report sa museo nga 48 ka bisita ang aksidenteng nakatunob sa peanut butter, samtang lima ka cellphone ang nahulog niini ug kinahanglang kuhaon.
Aduna usab usa ka insidente diin giingong adunay bata nga mitilap sa peanut butter.
Nakadawat usab ang museo og 80 ka reklamo pinaagi sa sulat ug telepono bahin sa talagsaong artwork.
Samtang, gihunahuna sa museo kung mahimo pa bang magamit ang peanut butter sa mga zoo, animal shelter o uban pang organisasyon.
Apan tungod kay walo na kini ka semana nga gibutang sa salog, dili na maseguro ang kalidad, kalimpyo ug kaluwasan niini isip pagkaon.
Tungod niini, ang gatosan ka kilo nga peanut butter gilabay na ngadto sa compostpit.