Magpadala ang Pilipinas og pito ka boksingero nga mosabak sa Asian Games sa Nagoya, Japan, aron paninguhaan nga putlon ang 16 ka tuig nga pagkauhaw sa nasod sa medalyang bulawan sa maong sangka.
Gipangunahan ang delegasyon sa mga iladong boksingero nga sila si Olympic medalists Nesthy Petecio, Carlo Paalam, Aira Villegas, ug Eumir Marcial, kauban sila si Riza Pasuit, Junmilando Ogaye, ug Norlan Petecio. Subay sa pamahayag ni ABAP President Marcus Manalo, ang opisyal nga pag-apil ni Marcial magdepende pa sa resulta sa iyang away karong Setyembre 19.
Sa kasamtangan, nipailalom sa usa ka training camp sa Thailand ang mga atletang Pilipino sa wala pa sila molupad paingon sa Japan sa Setyembre 21 alang sa kompetisyon nga pagahimoon gikan Setyembre 19 hangtod Oktubre 4. Kataposan nga nakakuha og medalyang bulawan sa boxing sa Asian Games ang Pilipinas kaniadtong 2010 pa pinaagi ni Rey Saludar sa Guangzhou, China, ug pulos na lang pilak ug tumbaga ang naangkon sa nasod sukad niadto.