Gitun-an pa sa House prosecution panel kung ipatawag isip testigo si Ramil Madriaga sa nagpadayon nga impeachment trial batok kang Vice President Sara Duterte.
Matud ni House Prosecutor Representative Terry Ridon, wala pa nakahimo og pinal nga desisyon ang panel bahin sa pag-atubang ni Madriaga sa Senate Impeachment Court, ilabina nga balik-balik nga gikuwestiyon sa depensa ang iyang kredibilidad.
Si Madriaga, nga giila isip self-confessed kanhi bodyguard ug bagman ni Vice President Sara Duterte, nahimong sentro sa legal nga isyu human siya kasuhan og perjury sa Bise Presidente tungod sa giingong false statements sa iyang supplemental affidavit.
Samtang, gikuwestiyon ni Ridon ang pagkomento ni Atty. Pancho Panelo sa witness strategy sa prosecution, ilabina sa iyang paghulagway nga mahimong “funeral” sa prosecution ang pagharap ni Madriaga tungod sa posibleng cross-examination sa depensa.
Gipasabot ni Ridon nga si Madriaga giisip nga “common witness,” busa dili kini awtomatikong mahimong bentaha lamang sa prosecution ug dili usab makapahuyang sa pikas nga kampo.