Target sa two-time Olympic champion nga Pinoy gymnast Carlos Yulo ang iyang unang bulawang medalya sa Asian Games nga ipahigayon sa Aichi-Nagoya, Japan sa Septyembre.
Makigsangka si Yulo sa men’s artistic gymnastics uban sa iyang igsoon nga si Eldrew Yulo, lakip sila Justine Ace De Leon, Miguel Besana ug Zachary Cortins Nunez.
Bisan pa og nakadaog na og 12 ka gold medal sa Asian Championships, wala pa makakuha og gold medal si Yulo sa Asian Games.
Niadtong 2018 Asian Games, nanguna si Yulo sa qualification sa floor exercise apan nahulog lamang kini sa ikapito nga pwesto sa finals. Wala usab siya nakasalmot sa 2023 Asian Games sa Hangzhou, China human iyang gipili nga moapil sa World Championships sa Belgium.
Karun, giisip si Yulo nga usa sa mga paborito nga modaog sa floor exercise ug vault events sa umaabot nga Asian Games.