P-pop group ECHO member nga si Sphere, mitaliwan na!

Mitaliwan na ang miyembro ug main vocalist sa P-pop boy group nga ECHO nga si Jaspher Cabangon o mas nailhan isip Sphere.

Gipahibalo sa management sa grupo ang iyang pagpanaw human kini mipahibalo kaniadto nga mopahulay una si Cabangon tungod sa iyang pagkapaospital.

Wala ipadayag sa management ang hinungdan sa iyang kamatayon ug gihangyo ang publiko nga respetuhon ang pribasiya ug panahon sa pagbangutan sa iyang pamilya ug mga kauban sa grupo.

Naghatag usab og pasidungog ang ECHO kang Cabangon, nga ilang giingon nga kanunay nilang mahinumdoman tungod sa kahayag ug kalipay nga iyang gidala sa mga tawo sa iyang palibot.