Gipunting sa pipila ka mga residente ug opisyal ang panginahanglan sa hugot nga pagmonitor ug inspeksyon sa mga poultry ug pig farm sa Barangay Patpat, Malaybalay City, Bukidnon aron masiguro ang pagsunod sa mga kinahanglanon sa kinaiyahan ug komunidad.
Sa pakighinabi sa Bombo Radyo Malaybalay kang Kapitan Renante M. Okit, Chairman sa Barangay Patpat, Malaybalay City, Bukidnon, gihulagway niini ang dili maayong kahimtang sa mga poultry ug pig farm sa maong lugar.
Matud ni Kapitam Okit, adunay labing menos walo ka poultry farm sa tibuok barangay, samtang adunay mga nagproseso sa pagpalapad sa ilang operasyon.
Matud pa sa opisyal, kon adunay reklamo sa usa ka pasilidad, angay kining isumite sa lokal nga panggamhanan aron mahimo ang hustong aksyon, lakip ang pag-inspeksyon ug pagsusi sa lugar.
Samtang, iyang gipadayag nga importante ang tukmang dokumentasyon ug aktuwal nga pagtan-aw sa kahimtang sa mga poultry ug pig farm.
Matud ni Okit, adunay katungod ang barangay sa paghimo og taho kon adunay seryosong reklamo, samtang ang mga hingtungdan sa siyudad maoy responsable sa pag-inspeksyon ug pagmonitor. Gidugang niini nga adunay mga pagbisita sa poultry ug pig area aron masusi ang mga reklamo ug ang aktuwal nga kahimtang sa mga pasilidad.
Subay niini ang pagpadayag sa pipila ka mga reisdente sa ilang mulo sa maong hagit nga giatubang sa palibot sama ni Alyas Marie.
Gidugang usab ni Alyas Lorna nga usa kini sa mga problema nga ilang giatubang karun sa kasamtangang panahon.