Walay plano ang gobyerno nga magpatuman og temporaryong pagdili sa pag-angkat og imported nga bugas bisan nagkaduol na ang ting-ani sa humay sa nasud.
Sumala kang Agriculture Secretary Francisco Tiu Laurel Jr., magpadayon ang pag-import og bugas aron masiguro nga adunay igo nga suplay samtang nangandam ang nasud sa posibleng grabe nga epekto sa El Niño sa ulahing bahin sa 2026.
Matud nii Laurel, importante nga adunay igo nga buffer stock aron matubag ang panginahanglan sa bugas gikan sa Disyembre hangtod Abril sa sunod tuig.
Base sa pinakabag-ong datos, miabot na sa kapin 3.3 milyon ka metric tons ang imported nga bugas isip kabahin sa pagpangandam alang sa ting-ulan.
Aron masuportahan ang mga mag-uuma, andam ang National Food Authority (NFA) sa pagpalit og hangtod 500,000 ka metric tons nga lokal nga humay ubos sa gipalapad nga procurement program alang sa wet season.
Gitagana usab sa Department of Agriculture (DA) ang P20 bilyon nga pondo alang sa pagpalit og lokal nga humay karong tuiga, nga kapin sa doble sa P9 bilyon nga budget niadtong miaging tuig.