Nadawat na sa Senate Impeachment Court ang mga dokumento gikan sa Bureau of Internal Revenue o BIR kalabot sa tax records ni Vice President Sara Duterte, iyang bana nga si Atty. Mans Carpio, ug mga korporasyong nalambigit kanila.
Ang maong mga dokumento gisumite human gitugotan ni Presidente Ferdinand Marcos Jr. ang pagpagawas niini. Lakip usab sa gipangayo sa korte ang bank records ug mga dokumento gikan sa Anti-Money Laundering Council o AMLC.
Matud kang House Prosecutor ug Bicol Saro Party-list Representative Terry Ridon, importante ang maong mga dokumento aron madugang sa mga ebidensya nga ilang gipresentar.
Samtang, gibutyag ni House Prosecution Spokesperson Zia Alonto Adiong nga ang tax records ug bank records makatabang masuta ang pondo ug mga transaksyon nga wala maapil sa Statement of Assets, Liabilities, and Net Worth o SALN.