Ming-apela si Senator-Judge Robin Padilla sa House prosecution panel nga magpabiling patas ug dili himuong “one-sided” ang impeachment trial ni Vice President Sara Duterte, ilabina sa pagpili ug pagpresentar sa mga testigo.
Gikwestiyon ni Padilla ang kredibilidad sa pipila ka testigo, lakip ang kanhi giingong miyembro sa Davao Death Squad o DDS nga si Arturo Lascañas tungod sa iyang giingong nagkalain-laing mga pamahayag.
Gikwestiyon usab ni Padilla ang duha ka opisyal sa National Bureau of Investigation o NBI nga giingong adunay mga alegasyon sa perjury o pagpamakak ubos sa panumpa.
Apan gipatin-aw ni House Lead Prosecutor Gerville Luistro nga walay nakabinbing kaso batok sa ilang mga testigo ug nga ang ilang pagpresentar gibase sa balaod ug sa mga ebidensyang may kalabotan sa giingong hulga ni VP Sara batok kang Pangulong Ferdinand Marcos Jr.
Tungod niini, giinsistir pag-usab ni Padilla ang iyang panawagan nga dili himuong “one-sided” ang proseso.
Giklaro ni Padilla nga ang iyang pamahayag dili nagpasabot nga mipabor siya sa bisan unsang kampo, kondili nanawagan lamang siya og patas nga pagtan-aw sa tibuok proseso sa impeachment.
Giklaro usab niini nga ang iyang punto may kalabotan sa pag-apil sa pipila ka senador sa paghusay sa kaso ug sa mga pamahayag bahin sa posibleng dili pag-apil sa pipila kanila sa pagboto sa impeachment court.