Pormal nang gipadala sa Senate Impeachment Court ang mga subpoena alang sa bank, tax ug financial records ni Vice President Sara Duterte, iyang bana nga si Atty. Manases Carpio, ug mga kompanyang giingong nalambigit kanila.
Ang mga dokumento susihon kalabot sa mga alegasyon sa unexplained wealth ubos sa Article II sa Articles of Impeachment.
Kabahin niini, gimandoan ang Bureau of Internal Revenue (BIR), Anti-Money Laundering Council (AMLC) ug nagkalain-laing banking institutions nga isumite ang mga dokumento ngadto sa Clerk of Court hangtod sa Hulyo 30, 2026, alas-9:00 sa buntag.
Sumala ni Senate Impeachment Court spokesperson Reginald Tongol, aduna nay pipila ka institusyon nga mituman sa maong direktiba ug nagsumite na sa mga bank checks ni Duterte.
Samtang, Gipatin-aw usab ni Tongol, nga walay epekto sa bisa sa resolusyon ang managlahing manifestations sa lima ka senator-judges batok sa subpoena alang sa bank ug tax records ni Vice President Sara Duterte.
Matud sa spokesperson sa korte, ang maong mga dokumento alang lamang sa rekord ug naglangkob sa tagsa-tagsa nilang legal nga panan-aw.