Gisaway ug gipaulanan og nagkalain-laing reaksyon gikan sa mga netizen ang sikat nga aktor nga si Joshua Garcia human kini na-intriga ug giakusahang usa ka “Diehard Duterte Supporter” kon (DDS).
Nag-ugat ang kontrobersiya sa dihang, namatikdan sa mga netizen nga gi-repost ug gi-heart sa aktor ang usa ka viral TikTok video nga nagpasundayag sa mga highlight sa impeachment trial ni Vice President Sara Duterte.
Tungod niini, daling gibirahan sa mga basher ang aktor ug gipuntirya ang iyang social media accounts.
Wala natapos ang intriga, kay pipila ka oras ang milabay, namatikdan usab sa mga netizen nga gi-unfollow na sa aktor sa Instagram si VP Sara Duterte ug Senator Alan Peter Cayetano. Gihimo kining “damage control” o paghugas-kamay sa uban aron malikayan ang mas grabe pang backlash ug maprotektahan ang iyang career image.
Bisan pa man sa init nga mga panaglalis ug paglabay sa nagkadaiyang akusasyon sa social media, aduna gihapong midepensa kang Joshua.
Matud sa uban, dili angay hukman ang usa ka tawo base lamang sa iyang gigamit nga social media following list ug labaw sa tanan, angay nga ilain ang iyang propesyon ug kahusay isip usa ka aktor sa iyang personal nga mga pagtan-aw sa pulitika.
Sa pagkakaron, nagpabiling sa hilom ang kampo ni Joshua ug wala pa’y pormal nga pamahayag nga gipagawas kalabot sa maong isyu.