Misaka na sa 21 ang gidaghanon sa mga namatay tungod sa Bagyong Inday ug Hanging Habagat human makumpirmar sa mga rescuer ang pagkarekober sa tulo ka mga lawas sa Barangay Tanuman, Jose Abad Santos, Davao Occidental, nga naanod sa baha niadtong Hulyo 10 nga nagguba sa mga karsada ug kabalayan.
Base sa datos sa mga awtoridad, siyam ang namatay sa Malapatan, pito sa Glan, Sarangani, duha sa Bukidnon, ug tulo sa Jose Abad Santos, Davao Occidental.
Samtang, 450 ka mga pamilya sa Sarangani Province ang gihikling sa ilang mga panimalay tungod sa baha ug pagdahili sa yuta nga gidala sa halos tulo ka adlaw nga walay hunong nga pag-ulan.
Sa Bangsamoro Autonomous Region in Muslim Mindanao o BARMM, milapas na sa tunga sa milyon ka mga residente ang naapektuhan sa kusog nga pagbaha. Nagkinahanglan karon ang mga apektadong komunidad og pagkaon, limpyo nga tubig, mga tolda ug materyales sa pagtukod aron maayo ang ilang mga naguba nga panimalay.
Sumala sa Department of Social Welfare and Development, milapas na usab sa 700,000 ka mga tawo ang naapektuhan sa epekto sa Hanging Habagat nga gipalig-on sa kanhing Super Typhoon Inday sa Northern Luzon, Visayas ug ubang bahin sa Mindanao.
Sa inisyal nga ebalwasyon sa Department of Agriculture, niabot na sa P12.5 milyon ang kadaot sa sektor sa agrikultura.
Kapin 500 ka ektarya sa humayan ug maisan ang nadaot lakip ang sektor sa kahayopan, samtang kapin 1,000 ka mga mag-uuma ang naapektuhan sa kalamidad.
Gisiguro sa DA ang paghatag og binhi, abono ug uban pang tabang alang sa mga naapektuhang mag-uuma.