NFA naghatag og mas taas nga presyo sa humay aron madugangan ang rice buffer stock

Naghatag og mas taas nga presyo ang National Food Authority o NFA sa pagpalit og humay o palay aron madasig ang mga mag-uuma nga ibaligya ang ilang ani ug madugangan ang rice buffer stock sa nasud.

Sumala ni NFA Administrator Larry Lacson, P4 hangtod P5 kada kilo ang mas taas nga tanyag sa NFA kon itandi sa presyo sa mga negosyante.

Gipunting nga ang dugang nga stock magsilbing pagpangandam sa posibleng pagkunhod sa produksyon sa palay tungod sa gilaumang “super” El Niño, nga mahimong makapakunhod sa produksiyon og hangtod 700,000 metric tons.

Sa pagkakaron, mokabat sa 75 ka adlaw nga suplay ang rice buffer stock sa nasud.