KITAOTAO, BUKIDNON — Patay ang usa ka 52-anyos nga bana samtang naangol usab ang iyang 32-anyos nga asawa human sila kalit nga gipamusil sa wala mailhing armado samtang nagsakay og motorsiklo sa Purok 4, Barangay Sinuda, ning lungsod, alas 10:20 sa buntag karong Lunes, Hunyo 15.
Subay sa imbestigasyon sa Kitaotao Municipal Police Station, padulong unta nga mobisita sa ilang anak ang magtiayon sa dihang kalit silang giatangan ug gipaulanan og bala sa suspek gamit ang wala pa matinong kalibre sa armas.
Gidali pagdala ang mga biktima ngadto sa German Doctors Hospital sa Buda, Marilog District, Davao City, apan gideklarang dead on arrival ang bana. Samtang, padayon pang ginaatiman sa mga doktor ang asawa nga nakaangkon og pinusilan sa wala nga bahin sa tiyan, diin gikatahong anaa na kini sa luwas nga kahimtang.
Sa pagkakaron, nagpadayon pa ang gihimong lawom nga imbestigasyon sa Kitaotao MPS aron mailhan ug madakpan ang mitalaw nga suspek, ingon man sa pagtino sa tinuod nga motibo sa maong krimen.