Nakatingkagol na karon sa selda sa kapulisan ang usa ka 37-anyos nga bana human niini gitigbas ang laing lalaki nga giingong misuway og dagmal ug sagpa sa iyang asawa didto sa Barangay Malipayon, Pangantucan, Bukidnon.
Subay sa inisyal nga imbestigasyon sa Pangantucan Municipal Police Station, nahitabo ang insidente alas 11:00 sa gabii niadtong Hunyo 14. Nagkalos og tubig ang asawa sa suspek sa dihang miduol ang 37-anyos usab nga biktima nga giingong hubog nianang panahona. Miulbo ang hait nga lalis tali sa duha hangtod nga misuway na og bakyaw sa kamot ang biktima aron sagpahon ang babaye.
Tungod niini, daling miatake ang bana aron panalipdan ang iyang kapikas ug makadaghang higayon nga gitigbas ang biktima gamit ang usa ka sundang. Nakaangkon og mga dako nga gisi sa iyang likod, wala nga bukton, ug kamot ang biktima, kinsa paspas nga gidala sa mga sakop sa Barangay Peacekeeping Action Team (BPAT) ngadto sa Bukidnon Provincial Hospital sa Kibawe.
Ang suspek gidali pag-turnover sa Barangay Captain ug mga BPAT personnel ngadto sa Pangantucan MPS, samtang giandam na sa mga awtoridad ang tukmang kaso nga ipasaka batok kaniya.