Remittances sa Pilipinas, posibleng mosaka og 7% sa 2040 — World Bank

Posibleng mosaka og pito ka porsiyento (7%) ang remittances sa mga OFW ngadto sa Pilipinas pag-abot sa 2040 kon mapalapdan pa ang oportunidad sa pagtrabaho sa gawas sa nasud, sumala sa World Bank.

Sa usa ka taho, giingon sa World Bank nga ang maong pagsaka mahimong mahitabo kon maminusan ang kalainan sa remittances nga madawat sa nagkalainlaing rehiyon sa nasud.

Sa miaging tuig, miabot sa rekord nga $35.63 bilyon ang remittances gikan sa mga Pilipino sa gawas sa nasud, mas taas kini og 3.3 porsiyento tandi sa 2024.

Girekomenda usab sa World Bank ang paghatag og mas daghang oportunidad sa trabaho, lakip na sa gawas sa nasud, aron mapaspasan ang pagkunhod sa kakabos sa Pilipinas.