Mipadayag si Senador Panfilo Lacson nga andam ang Senate majority bloc sa bisan unsang posibleng lihok ni Senador Alan Peter Cayetano kon matuman ang espesyal nga sesyon sa Senado.
Matud ni Lacson, ilang gipanaghisgutan ang mga posibleng lakang kon adunay mga pagsulay sa pagpugong o pagsamok sa maong sesyon.
Dugnag usab niini nga dili angay balewalaon ang kapasidad ni Cayetano sa paghimo og kontrobersiya tungod sa iyang mga nangaging aksyon sa politika.
Dugang pa sa senador nga nahinumduman niya ang mga hitabo kaniadto sa Kamara sa dihang nag-atubang si Cayetano og isyu sa iyang liderato isip Speaker.
Sumala pa ni Lacson, gawas kang Cayetano ug pipila sa iyang mga kaalyado, kadaghanan sa mga senador nag-ila kang Senador Sherwin Gatchalian isip kasamtangang lider sa Senado.
Gipasabot usab niya nga importante nga malikayan ang bisan unsang lihok nga mahimong makasamok sa trabaho sa Senado, ilabi na nga adunay mga mahinungdanong balaodnon ug mga appointment nga kinahanglan aksyunan.
Sa pagkakaron nanawagan si Lacson sa tanang senador nga motambong sa espesyal nga sesyon isip kabahin sa ilang katungdanan ug responsibilidad sa katawhan.
Gidayeg usab niini si Sen. Joel Villanueva tungod sa iyang pagtambong sa maong sesyon ug naglaom nga mosunod usab ang ubang mga miyembro sa minorya.