38 ka indibidwal na ang kumpirmadong nakalas, 478 ang naangol, samtang upat pa ang nagpabiling missing human sa kusog nga magnitude 7.8 nga linog nga miuyog sa pipila ka bahin sa Mindanao. Subay sa pinakabag-ong datus gikan sa tigpamaba sa Office of Civil Defense o OCD nga si Juni Castillo , na matod pa nagpadayon pa gihapon ang damage assessment sa mga dapit nga labing grabeng naapektuhan partikular na sa General Santos City, Sarangani, ug South Cotabato diin mokabat na sa kapin 2,500 ka mga kabalayan ug mga imprastraktura ang nangadaot.
Base sa opisyal nga report sa OCD, mitala na sa kapin P562.8 milyonpesos ang kantidad sa kinatibuk-ang danyos sa mga pampublikong pasilidad, tunghaan, dalan, ug mga taytayan sa tibuok Davao Region ug SOCCKSARGEN. Sa kinatibuk-ang datus, 2,505 ka kabalayan ang naapektuhan sa maong sismo diin 466 niini ang totally damaged o nangaguba gyud sa hingpit. Samtang, padayon gihapon ang kahadlok sa mga residente taliwala sa nagpadayong serye sa aftershocks diin nakarekord na ang PHIVOLCS og 1,209 ka mga pagtay-og nga adunay kakusgon nga magnitude 1.3 hangtod 6.4.Tungod sa maong pagkagusbat, nagpadayon karon ang structural integrity assessment sa mga bilding aron masuta kung luwas pa ba kini nga gamiton sa dili pa patugotan nga makabalik ang mga residente ug mga empleyado. Prayoridad karon sa kagamhanan ang dinaliang pag-apod-apod og pagkaon, limpyong tubig, ug temporaryong kapuy-an, dungan sa pagpabalik sa serbisyo sa mga ospital ug uban pang critical facilities. Sa pagkakaron, nakatutok ang mga awtoridad sa search, rescue, ug retrieval operations diin dinalian nang gipakatap ang 2,784 ka mga personnel gikan sa AFP, PNP, ug BFP sa mga dapit nga grabeng gihandusan sa kalamidad.