Napulo ka kinabuhi ang natalang nakalas samtang nagpadayon ang mga pag-atake sa Gaza, bisan pa sa kasabotan sa hunong-buto nga gipatuman.
Sumala sa taho gikan sa Gaza Civil Defence ug mga lokal nga sentro sa panglawas, miigo ang serye sa mga operasyong militar sa Israel niadtong miaging Domingo nga miresulta sa kamatayon sa daghang sibilyan.
Lakip sa mga biktima ang upat ka tawo nga nahanaw human gitirahan og airstrike ang usa ka sakyanan duol sa Al-Buraq School sa Gaza City, samtang lima pa ang nakabsan sa kinabuhi ug 17 ang naangol sa laing pag-atake nga gitumong sa usa ka estasyon sa kapulisan sa Al-Mawasi, Khan Yunis.
Dugang pa, usa ka mangingisda ang gikatahong gipusil usab sa mga pwersang pandagat sa Israel.
Sa pagkakaron, nagpahibalo ang militar sa Israel nga ila na nga ginasusi ang maong mga alegasyon.
Bisan pa sa ceasefire nga nagsugod pa niadtong Oktubre sa milabay nga tuig, padayon ang sumbalikay sa mga akusasyon sa paglapas sa kasabotan tali sa Israel ug Hamas.
Base sa datos gikan sa Ministry of Health sa Gaza, miabot na sa 961 ka Palestiniano ang namatay sukad nagsugod ang truce, samtang lima usab ka sundalo sa Israel ang natala nga nakalas sa maong panahon.