Gianunsyo ni Senate President Pro Tempore Sherwin “Win” Gatchalian ang work-from-home o WFH arrangement alang sa mga kawani sa Senado karong Huwebes, Hunyo 4, 2026, tungod sa bag-ohayng mga panghitabo sa Senado nga nakaapekto matud pa sa operasyon ug morale sa mga empleyado.
Sa usa ka Senate advisory, giingon ni Gatchalian nga tumong sa maong lakang ang pagpreserbar sa neutrality sa bureaucracy sa Senado.
“To preserve the neutrality of the Senate bureaucracy,” matud sa advisory, gitugotan ang tanang kawani sa Secretariat ug Senate Proper nga magtrabaho gikan sa ilang panimalay.
Gipasiguro usab nga dili kini isipon nga insubordination, AWOL, o paglapas sa mga lagda.
Una niini, nagpagawas og memorandum si Senador Alan Peter Cayetano nga nag-ila sa iyang padayon nga pag-angkon sa liderato sa Senado ug giingong magpadayon ang tanang nakatakdang hearing sa Hunyo 4, lakip ang Blue Ribbon Committee hearing.
Sumala ni Cayetano, magpabiling abli ang Senado ug adunay siya’y awtoridad sa mga pasilidad niini subay sa 1987 Constitution.
Gipasidan-an usab niya nga dili dapat “padlockan” ang Senado ug giingong ipadayon gihapon ang committee hearing.
Plano usab niyang moadto sa Senado sa dili pa mag-alas 10 sa buntag aron masiguro ang pag-abli sa session hall alang sa hearing.
Samtang, sigon ni Gatchalian nga ang desisyon nga dili magpahigayon og official business konektado sa mga kausaban sa liderato ug reorganisasyon sa mga komite sa Senado.
Ang Blue Ribbon Committee nga kaniadto ubos sa kampo ni Cayetano, gikatahong karon nga gipangulohan na ni Senador Erwin Tulfo human sa mga kausaban sa mayorya niadtong Miyerkules.