Giila ug hingpit nga gerespeto sa Malacañang ang desisyon sa bag-ong mayorya sa Senado, lakip na ang pagdumala ni Acting Senate President Sherwin “Win” Gatchalian.
Sumala pa kay Palace Press Officer Claire Castro, ang mga kalit nga kausaban ug kudeta nga nahitabo sulod sa hawanan sa Senado nga legal ug hingpit nga nakauyon sa balaod o subay sa gitawag nga “rule of law.”
Subay niini, gipatin-aw usab ni Senador Erwin Tulfo, chairman sa Senate Blue Ribbon Committee, nga legal ug subay sa desisyon sa Supreme Court ang gihimong reorganisasyon ug pagpadayon sa sesyon sa Senado.
Sumala ni Tulfo, gihimo ang maong lakang tungod sa giingong paglapas sa Konstitusyon human gipasagdan sa kanhi majority bloc ang patakaran pinaagi sa wala pagpahigayon og sesyon sulod sa tulo ka sunod-sunod nga mga adlaw.