Midepensa karon ang Traffic Management Center kun TMC Malaybalay kalabot sa kontrobersyal nga pag-isyu og citation ticket ngadto sa usa ka drayber sa multicab nga mikalat sa social media human giakusahan ang usa ka traffic enforcer nga dili patas sa pagpatuman sa balaod.
Sa eksklusibong pakighinabi sa Bombo Radyo Malaybalay gipatin-aw ni TMC Traffic Operations Officer 1 Justino Roy Santonino nga subay sa City Ordinance 900 dako ang tulubagon sa maong drayber tungod sa mga nakitang visible violations niini lakip na ang yellow box violation obstruction dili hustong uniporme ug ang pagsul-ob og tsinelas samtang nagmaneho.
Gidugang ni Santonino nga posible pa silang maghimo og rekomendasyon ngadto sa Land Transportation Office batok sa drayber tungod sa gipakita niining arrogance kun dili maayong pamatasan base sa viral video lakip na ang pagkomot ug paglabay sa citation ticket.
Sa laing bahin gipasabot sa enforcer nga si Junell Jacutin nga misulod ug nagpabilin sa yellow box area ang drayber ug wala mosunod sa 15 seconds rule sa loading ug unloading zone. Giklaro ni Jacutin nga wala niya dayon gi-ticketan ang drayber apan tungod kay nagpadayon kini sa pag-yawyaw ug pagmagahi maong napugos siya sa pag-validate sa mga violation.
Tungod niini nanawagan karon ang pamunuan sa TMC nga respetuhon ang mga traffic enforcer ug sundon ang balaod sa trapiko aron mapadayon ang disiplina sa kadalanan sa Dakbayan sa Malaybalay.