Gibatikos sa House prosecution panel ang pagpamugos sa pipila ka senador nga tugutan ang online participation kon magsugod na ang impeachment trial batok kang Vice President Sara Duterte.
Matud ni House trial spokesperson Rep. Zia Alonto Adiong, ang maong sistema nga giingong “Zoom impeachment” mahimong makapahuyang sa pagsalig sa publiko kung kini tugutan.
Gipunting ni Adiong, dili angay nga tugutan sa Senate leadership ang mga senador nga motambong ug moboto pinaagi sa online platform sa impeachment proceedings.
Dugang pa ni Adiong, mas importante ang personal o pisikal nga presensya sa mga senador gumikan kinahanglan nila personal nga madungog ang testimonya ug masusi ang ebidensya sa pagdungog.
Pinaagi sa ilang presensya, mas maobserbahan usab ang pamatasan ug reaksyon sa mga testigo atol sa cross-examination.
Una nang gisugyot sa majority bloc sa Senado ang pag-usab sa rules aron tugutan ang online participation, apan kusog usab ang pagsupak niini sa minority bloc.
Gibalikan usab niini ang epekto sa online classes sa panahon sa pandemya, diin matud pa mikunhod ang kalidad sa pagkat-on sa mga estudyante tungod sa remote setup nga gitawag og “Zoom classes.”
Bisan lahi ang konteksto sa Zoom classes ug Zoom impeachment, gipunto ni Adiong nga kinahanglan malikayan ang pagkunhod sa kalidad ug kredibilidad sa impeachment trial tungod lang sa online participation.