Gipasabot sa National Bureau of Investigation o NBI nga walay “special treatment” nga ihatag kang Senador Jinggoy Estrada kon ipatuman na sa korte ang posibleng warrant of arrest batok kaniya may kalabotan sa iyang giatubang nga mga kaso.
Matud ni NBI Director Atty. Melvin Matibag, parehas lamang ang proseso nga sundon sa NBI alang sa senador sama sa ubang mga indibidwal nga adunay warrant of arrest nga gi-isyu sa korte.
Gipasabot usab ni Matibag nga dili na sakop sa hurisdiksyon sa NBI ang kahimtang sa panglawas ni Estrada human kini maaresto tungod kay iturn-over dayon siya ngadto sa kustodiya sa korte nga nagpagawas sa warrant.
Nahisgutan kini human ipadayag ni DILG Secretary JonvIC Remulla nga posibleng nagkinahanglan og knee replacement surgery ang senador.
Dugang pa sa NBI Director nga ang warrant of arrest maoy paagi aron makuha sa korte ang hurisdiksyon sa usa ka akusado.
Sumala ni Matibag, adunay duha ka opsyon si Estrada kon magpagawas man og warrant ang Sandiganbayan ang boluntaryong mosurender o pangitaon ug dakpon sa mga otoridad aron maturn-over sa korte.
Sa pagkakaron, wala pa makapagawas og bag-ong warrant of arrest ang Sandiganbayan Fifth Division batok sa senador alang sa kasong plunder.
Kahinumduman nga sayo pa niadtong Biyernes, nagpagawas na og warrant ang Sandiganbayan Second Division may kalabotan sa kasong graft diin dayon mitungha si Estrada aron magpiyansa.
Ang Office of the Ombudsman maoy nagpasaka sa graft ug plunder cases batok sa senador tungod sa giingong pagkakadawit niini sa kontrobersyal nga flood control projects.