Wala pa nakapagawas og warrant of arrest ang Sandiganbayan Fifth Division batok kang Senador Jinggoy Estrada kalabot sa kasong plunder nga may kalambigitan sa giingong maanumalyang flood control projects.
Sumala ni Sandiganbayan Presiding Justice Geraldine Econg, adunay pending motion nga gisumite ang kampo ni Estrada maong wala pa makapagawas og warrant ang korte.
Lakip niini ang urgent motion to withdraw the issuance of warrant of arrest nga gisumite sa mga abogado sa senador niadtong Biyernes sa Sandiganbayan Second ug Fifth Divisions.
Matud pa ni Econg, posibleng dili pa una magpagawas og warrant ang Fifth Division hangtod dili pa maresolba ang maong mosyon kon kini adunay epekto sa aksyon sa korte.
Ang kasong plunder giila nga non-bailable offense.
Nagpasabot kini nga kon makapagawas na og warrant of arrest, mahimong dayong mapriso ang akusado gawas lamang kon aprobahan ang petisyon alang sa piyansa samtang ginadungog pa ang kaso.
Samtang, mas sayo nang nagpagawas og warrant of arrest ang Sandiganbayan Second Division batok nila Estrada ug kanhi DPWH Secretary Manuel Bonoan kalabot sa laing flood control graft case.
Nakapiyansa dayon sila Estrada ug Bonoan og tig-₱90,000 aron temporaryong makagawas.
Gipasabot usab ni Econg nga nakapagawas ang ilang dibisyon og warrant ug Hold Departure Order gumikan nakasugod na ang deliberasyon sa kaso sa wala pa maisumite ni Estrada ang iyang urgent motion.
Dugang pa niini, giila sa korte nga adunay probable cause human sa ilang deliberasyon sa kaso.