Opisyal nang nakasulod sa Philippine Area of Responsibility (PAR) ang Tropical Storm “Jangmi” takna alas-12:30 sa tungong kagabhion, Mayo 29 ning kasamtangang tuig diin gihatagan kini sa lokal nga pangalan nga bagyong “Domeng.”
Subay sa labing ulahing weather bulletin gikan sa Philippine Atmospheric, Geophysical and Astronomical Services Administration (PAGASA), ang sentro sa bagyo kataposang namatikdab sa gilay-on nga 1,200 ka kilometros sa sidlakang bahin sa Southern Luzon.
Nagbaton kini og gikusgon sa hangin nga moabot ngadto sa 75 kilometros matag oras ug adunay pagbugso nga moabot sa 90 kilometros matag oras, samtang naglihok kini pa-amihan o northward sa katakson nga 20 kilometros matag oras.
Gipahayag sa PAGASA nga gilaumang mas mosamot pa ang kakusog sa maong bagyo ug posibleng mosaka ngadto sa typhoon category pag-abot ugma sa Sabado, Mayo 30.