Gipahibalo sa United Broiler Raisers Association kon (UBRA) nga padayong nag-ubos ang farmgate prices sa manok sa nasud tungod sa hinay nga panginahanglan ug sobrang suplay sa produksyon.
Matud ni UBRA president Elias Jose Inciong, bisan pa sa init nga panahon nga sagad naghagit sa pag-alima sa mga manok, wala kini nahimong babag sa abunda nga suplay sa merkado karon. Gipasabot usab ni Inciong nga ang nagpadayong panagbangi sa Middle East nga nagduso sa pagsaka sa presyo sa lana ang usa sa mga rason sa paghuyang sa demand alang sa broiler chicken.
Tungod niini, nag-atubang og dakong lugi ang mga mag-uuma tungod human mitaas ang gasto sa pag-alima apan mubarato ang presyo sa ilang baligya. Gikabalak-an sa grupo nga kung magpadayon kini, posibleng mawad-an og gana ang mga lokal nga mag-uuma sa pagpadayon sa ilang operasyon, nga mosangpot usab sa mas mahal nga presyo sa pag-angkat og hatchlings.
Gipasidan-an pa sa asosasyon nga posibleng moabot pa sa P70 matag kilo ang farmgate price sa katapusan sa bulan sa Mayo sa higayon nga magsugod na ang ting-ani.
Base sa datos sa Philippine Statistics Authority, mitala ang lokal nga produksyon sa manok og 585,470 metric tons sa unang kwarter sa 2026, nga mas taas og 5.8 porsyento kon itandi sa miaging tuig.