Wala pa’y namonitor nga kaso sa nangamatay nga mga fingerlings o similya sa isda ang Bureau of Fisheries and Aquatic Resources (BFAR) taliwala sa grabeng hulga sa El Niño ug sa nasarang kainit sa panahon karon.
Sa eksklusibong pakighinabi sa Bombo Radyo Malaybalay, gipahayag ni BFAR Aquaculturist ug Information Officer Mark Anthony J. Navarro nga nagpabiling luwas ang mga similya nga gipang-apod-apod ngadto sa mga fisherfolk. Tungod niini, giawhag sa buhatan ang mga mangisda ug fish grower nga magpadayon sa pagpadako og isda basta masiguro lamang ang hustong giladmon sa tubig nga mokabat sa usa hangtod 1.5 metros aron malikayan ang problema sa fish production.
Dugang pa ni Navarro nga gawas sa init, duna silay nadawat nga pipila ka report sa mga nabanlas nga fishpond tungod sa kalit nga pagbaha. Hinuon, dinalian nga gipasalig sa BFAR nga aduna silay ginahatag nga ten percent (10%) mortality allowance aron masiguro nga igo ug mapahimuslan gihapon sa mga benepisyaryo ang madawat nga suplay.