Posibleng mawala sa hingpit ang bililhong kultura ug kasaysayan sa mga kaigsuonang lumad o Indigenous Peoples (IP) sa Bukidnon sulod sa 20 ngadto sa 30 ka dekada kon dili kini dinalian nga maaksiyonan karon.
Kini ang gipahayag ni Bukidnon Provincial Governor Rogelio Neil P. Roque diin iyang gipasabot nga usa ka dako nga hagit alang sa mga lider sa tribu ang pagpreserba sa maong tradisyon tungod kay nagkagamay na lamang ang nahibiling “100% IP” nga nagsubay sa tiunay nga kultura sa probinsya.
Subay niini, gipasalig sa gobernador ang hugot nga suporta sa probinsyal nga kagamhanan pinaagi sa pag-ila, pag-dokumento, ug pag-plastar sa mga sagradong tradisyon aron daling mapasa ngadto sa sunod nga henerasyon.Gihimo sa gobernador ang maong deklarasyon human kini mitambong sa General Monthly Meeting sa mga Indigenous Peoples Mandatory Representatives (IPMRs) didto sa Provincial IP Tulogan, Kaamulan Park, ning siyudad sa Malaybalay.