Kritikal karon sa balay tambalanan ang usa ka 48-anyos nga lalaki human maigo sa daghang pinusilan didto sa Purok 1, Barangay Sinuda, lungsod sa Kitaotao. Base sa report sa Bukidnon Provincial Police Office, gi-kompronta ug giharass sa biktima uban sa iyang mga kauban ang usa ka 38-anyos nga suspek tungod sa pagtuo nga kini ang nagsumbong sa kapulisan kalabot sa presensya sa mga wanted person sa ilang dapit.
Apan misangpot sa dugoon nga engkwentro ang maong komprontasyon human naunhan og pusil sa suspek ang biktima gamit ang kwarentay-singko (.45) nga pistola, hinungdan nga nakaangkon kini og grabe nga mga samad sa lawas ug dinalian nga gidala sa Quezon Infirmary Hospital.
Human sa krimen, daling mikalagiw ang suspek apan boluntaryo usab nga misurender sa Kitaotao Municipal Police Station bitbit ang nuybe milimetro (9mm) nga pistola nga iyang nakuha gikan sa biktima. Sa kasamtangan, ang suspek anaa na sa kustodiya sa kapulisan alang sa saktong disposisyon.