Kritikal karon ang kondisyon o kahimtang sa usa ka 34-anyos nga lalaki human kini gipusil sa iyang kaugalingong boardmate sa Purok-1, Barangay Violeta, Malaybalay City kagahapong adlawa, Mayo 3 ning kasamtangang tuig.
Base sa report sa kapulisan, nahitabo ang insidente pasado ala-una sa kadlawon human ang suspek nakig-away sa ka live-in partner niini ug kalit nga gisipa ang pultahan sa lawak sa biktima.
Sa walay igong rason, gipusil sa suspek ang biktima gamit ang kalibre .45 nga pistola diin naigo kini sa wala nga bahin sa iyang nawong.
Human sa pagpamusil, daling miikyas ang suspek uban ang pamilya samtang ang biktima gidala sa Bukidnon Provincial Medical Center (BPMC).
Nakuha sa crime scene ang usa ka basiyo ug usa ka buhing bala, samtang selos ang gilantaw nga motibo tungod sa pagka-higala sa biktima ug sa kapuyo sa suspek.
Sa pagkakaron, ang Malaybalay City Police Station nagpadayon sa ilang manhunt operation aron madakpan ang maong suspetsado.