Duha ka suspek sa carnapping, tiklo sa OPLAN SILYO sa Lanao del Norte. Gilusad sa Philippine National Police ang OPLAN SILYO aron palig-onon ang police visibility ug seguridad batok sa mga kriminal.
Kini nga operasyon daling gi-aktibar human sa nahitabong carnapping sa Sitio Nunucan, Barangay Maria Cristina, Iligan City, diin ang mga suspek misulay pag-ikyas paingon sa Balo-i.
Pinaagi sa koordinasyon sa Oplan Shield ug pagpahimutang og mga checkpoint, naniid pag-ayo ang mga unit sa kapulisan lakip na ang Pantar MPS.
Tungod sa kaabtik sa mga otoridad, malampusong nadakpan ang duha ka suspek sa checkpoint sa Pantar ug gidala na sa Iligan City Police Station 2.
Ang paspas nga aksyon resulta sa koordinasyon sa City Tactical Operation Center (CTOC) ngadto sa mga kasikbit nga lungsod.
Gipasalig usab sa PNP nga magpadayon ang OPLAN SILYO alang sa kalinaw ug giawhag ang publiko nga magpabiling mabinantayon.