MALAYBALAY CITY, BUKIDNON – Nagpabiling nagpaabot sa opisyal nga aprobasyon sa Sangguniang Panlungsod ang sektor sa transportasyon sa Malaybalay City alang sa gihangyong ₱15 nga minimum plete sa motorela.
Sa pakighinabi kang Marlon Igpit, presidente sa United Motorela Operator Driver Association (UMODA), giklaro niini nga ₱13 pa gihapon ang kasamtangang pletehan gikan Poblacion ngadto sa Poblacion, samtang ₱14 usab alang sa rutang padulong sa Landing. Bisan pa man sa pagsaka sa gasto sa operasyon, gipahinumdoman ang mga drayber nga sundon gihapon ang kasamtangang taripa samtang wala pa’y bag-ong kamanduan.
Gipasabot ni Igpit nga bisan og mitaak na sa ₱80 ngadto sa ₱85 ang presyo sa gasolina matag litro, dili gihapon kini igo aron matubag ang kakulang sa kita sa mga drayber. Bahin usab sa reklamo sa mas taas nga paningil matag gabii, gipatin-aw sa opisyal nga kabahin kini sa “Pakyaw” rate nga nakalatid sa taripa sugod alas 8:00 sa gabii, apan kasagaran sa mga drayber maningil lamang og ₱20 matag usa aron dili kaayo mabug-atan ang mga pasahero.
Nanawagan ang asosasyon sa ilang mga miyembro nga magbaton og igong pasensya samtang nagpadayon ang ilang koordinasyon sa gobyerno alang sa gitinguha nga fare adjustment.