Gipahimuslan sa moabot 250 ka motorela drayber ang “subsidized rice” nga nagkantidad lamang og ₱20 matag kilo pinaagi sa programa sa lokal nga panggamhanan sa Malaybalay City.
Sa pakighinabi kang Marlon Igpit, presidente sa United Motorela Operator Driver Association (UMODA), gibutyag niini nga ang matag drayber nakadawat og 10 ka kilo nga bugas niadtong Abril 29. Kini nga inisyatiba nagtumong sa pagpagaan sa kalisod sa mga drayber taliwala sa nagkataas nga presyo sa lana ug inadlaw-adlaw nga paliton.
Gipasabot ni Igpit nga dako ang nadaginot sa matag pamilya tungod kay gikan sa ₱550 nga kantidad sa 10 ka kilo nga bugas, nahimo na lamang kining ₱200. Alang sa mas hapsay ug organisadong distribusyon sa mosunod nga mga bulan, gipailalom ang mga benepisyaryo sa QR code system.
Bisan pa man og limitado pa ang slots matag bulan, gipaniguro sa asosasyon nga adunay sunod nga batch sa distribusyon aron mahatagan usab ang uban sa kapin usa ka libo ka mga drayber ug operators sa tibuok siyudad. Gidasig ang mga wala pa makadawat sa paghulat lamang sa ilang turno samtang padayon ang koordinasyon sa gobyerno alang sa maong ayuda.