Adunay igong basehan ang gidusong impeachment complaint batok kang Bise Presidente Sara Duterte, partikular na ang isyu sa iyang Statement of Assets, Liabilities, and Net Worth (SALN) ug uban pang giingong iregularidad.
Kini ang gipahayag ni Atty. Eddie Cuaresma, kanhing presidente sa Integrated Bar of the Philippines (IBP). Sumala sa abogado, ang mga wala motugma nga deklarasyon sa SALN mahimong gamitong basihan sa impeachment, susama sa nahitabo sa mga kanhing opisyal sa gobyerno kaniadto.
Gipasabot ni Cuaresma nga kon makakita og probable cause ug substantial evidence ang House Committee on Justice, posibleng mosaka ang kaso sa Senado nga magsilbi isip impeachment court. Bisan pa niini, gipasiugda sa abogado nga nagpabiling “innocent” ang Bise Presidente hangtod nga dili mapamatud-an ang sala niini pinaagi sa usa ka patas nga husay.
Dugang pa, gitawag ni Cuaresma ang impeachment isip usa ka importante nga mekanismo sa accountability aron masiguro nga walay abuso sa gahum ug maprotektahan ang interes sa katawhan ubos sa balaod.