Malampuson ang gihimong pagbulag sa Filipino conjoined twins nga sila Klea Ann ug Maurice Ann Misa human sa usa ka komplikadong 13 ka oras nga operasyon niadtong Abril 23, ubos sa suporta sa gobyerno sa Saudi Arabia.
Sumala sa embahada sa Saudi Arabia sa Manila, ang maong operasyon giisip nga usa sa labing malisod nga kaso sa tibuok kalibotan diin dose-dosena nga mga espesyalista gikan sa nagkalain-laing natad ang ningsalmot.
Human sa kinatibuk-ang 18 ka oras ug tunga nga pagpaabot, mipahayag og tumang kalipay ang inahan sa kambal tungod sa kalamposan sa surgery nga maghatag sa mga anak niini og higayon nga mabuhing gawasnon ug adunay bag-ong paglaom.Â
Ang maong operasyon gihimo pinaagi sa mando ni King Salman bin Abdulaziz ug Crown Prince Mohammed bin Salman bin Abdulaziz Al Saud, diin ang kambal unang niabot sa Saudi Arabia niadtong Mayo 2025 ug gidala sa King Abdullah Specialized Children’s Hospital sa Riyadh.
Gipatin-aw ni Abdullah bin Abdulaziz Al Rabeeah, pangulo sa medical ug surgical team, nga nahimong lisod ang kaso tungod sa pagkadikit sa ilang mga ulo, pagkalambigit sa mga ugat sa utok, ug pagkasumpay sa mga brain tissue.
Nahimo usab kining mas peligroso tungod sa luya nga kasingkasing ug pagpalya sa rilyon ni Klea Ann, hinungdan nga misaka ang risk level sa operasyon ngadto sa 50%.