Nasikop ang usa ka lalaki sa hiniusang pwersa sa kapulisan sa pagpanguna sa Iligan City Police Station (ICPS 4) takna alas 10:00 sa buntag niadtong milabayng adlaw sa Purok 8, Barangay Tambacan, Iligan City. Giila ang dinakpan nga us aka 47 anyos, lalaki, ug residente sa nasangpit nga lugar.
Subay sa report, nasakmit gikan sa posisyon sa suspek ang usa ka pakete sa gituohang shabu nga gigamit isip buy-bust item nga may gibug-aton nga 0.1 gramo.
Samtang siyam pa ka pakete nga adunay parehas nga substansiya nga may kinatibuk-ang timbang nga 0.8 gramo, duha ka gagmayng papel, usa ka ₱100, usa ka ₱200 nga gigamit isip buy-bust money, usa ka coin purse diin ang kinatibuk-ang gibug-aton sa nakumpiskang iligal nga droga miabot sa 0.9 gramo nga nagkantidad og 6,120.00.
Sa pagkakaron, ang nadakpan nga suspek anaa na sa kustodiya sa PS4-ICPO alang sa hustong disposisyon ug pag-atubang sa kasong paglapas sa Republic Act 9165 o ang Comprehensive Dangerous Drugs Act of 2002.