Miabot sa dul-an tunga sa milyon ka pesos ang danyos human maugdaw ang lima ka kabalayan sa nahitabong sunog sa Purok 1, Barangay Dologon, Maramag, Bukidnon, niadtong kaadlawon sa Abril 26, 2026.
Sa report gikan sa Bureau of Fire Protection (BFP), nagsugod ang kalayo alas 12:30 sa kaadlawon. Subay sa inisyal nga imbestigasyon, gituohang nagsugod ang kaisog sa kalayo sa panimalay sa usa ka residente nga giilang si alyas “Jane.” Gikaingong nagluto kini gamit ang kahoy nga gatong apan wala mabantayi, hinungdan sa paspas nga pagkaylap sa kalayo ngadto sa silingang mga balay.
Hingpit nga nadeklarar nga “fire out” ang insidente alas 1:20 sa kaadlawon. Maayo na lang kay walay natala nga nasamdan o nakabsan sa kinabuhi, apan ang kinatibuk-ang danyos sa kabtangan gibana-banang mikabat sa Php 490,500.00.
Padayon pa ang gihimong lawom nga imbestigasyon sa mga otoridad aron masuta ang uban pang detalye ug maseguro ang kaluwasan sa maong dapit.