Gilauman ni Department of the Interior and Local Government (DILG) Secretary Juanito Victor “Jonvic” Remulla nga ang pagkasikop kang kanhing kongresista nga si Zaldy Co makatabang sa pagbutyag sa daghang misteryo sa mga anomalya sa flood control controversy.
Sumala ni Remulla, ang pagdakop kang Co kabahin pa lamang sa mas lapad nga imbestigasyon sa mga iregularidad sa mga proyekto ilalom sa flood control scheme.
Dugang pa, dinhi magsugod ang pagkompleto sa mga piraso sa kamatuoran aron mabutyag ang mga dagkong personalidad nga anaa sa likod sa maong anomalya.
Samtang, nagpasidaan usab ang kalihim sa ubang mga indibidwal nga posibleng nalambigit sa isyu nga dili sila mapanalipdan sa ilang kwarta kung determinado ang mga otoridad sa Pilipinas sa pagdakop kanila.