Gitawag ni US President Donald Trump ang lider sa Simbahang Katoliko nga si Pope Leo XIV nga “weak” o huyang kon hisgutan ang krimen ug “terrible” o bati pag-abot sa foreign policy.
Gihimo ni Trump ang maong pamahayag batok sa Santo Papa human gisaway sa Catholic leader ang mga polisiya sa Presidente sa Amerika kalabot sa foreign affairs ug immigration.
Nisilaob ang kritisismo sa Santo Papa tungod sa bahad ni Trump nga gub-on ang sibilisasyon sa Iran, butang nga gitawag sa pontiff nga “unacceptable” o dili madawat. Nanawagan usab si Pope Leo og lawom nga pagpamalandong sa pamaagi sa pagtrato sa mga migrante sa Amerika ubos sa administrasyon ni Trump.
Sa usa ka post, giingon ni Trump nga kinahanglan ayuhon ni Pope Leo ang iyang lihok isip Santo Papa ug giangkon usab niya sa mga tigbalita nga dili siya “big fan” sa pontiff.
Kini nga panagbangi nagpakita sa nagkagrabe nga tensyon tali sa White House ug sa Vatican samtang padayon ang lalis sa mga hisgutanan sa seguridad ug tawhanong katungod sa tibuok kalibutan.