Nagtrending karon sa social media ang usa ka talagsaon nga tradisyon sa Trento, Italy, nga gigamit isip satirical nga paagi sa pagsaway sa mga lider o personalidad nga nakahimo og makauulaw o kontrobersyal nga desisyon.
Kini nga kalihokan kabahin sa selebrasyon sa Feste Vigiliane, diin ginahimo ang ritwal nga gitawag og “La Tonca.”
Sa maong ritwal, adunay gitawag nga “Court of Penance” nga mopili sa mga indibidwal diin kasagaran mga politiko nga giisip nga adunay labing kontrobersyal o sayop nga desisyon sulod sa tuig.
Ang mapili nga personalidad simbolikong ibutang sa usa ka hawla ug ilubog sa Suba sa Adige kaduha o katulo isip bahin sa seremonya.
Bisan pa niini, dili kini tinuod nga silot kundili usa lamang ka pamaagi sa kataw-anan ug publikong pagsaway.
Sumala sa kasaysayan, ang maong tradisyon nagsugod pa sa ika-14 hangtod ika-17 siglo isip pamaagi sa pagpahayag sa pagbati sa katawhan batok sa mga lider nga napakyas sa ilang responsibilidad o katungdanan.
Sa Pilipinas, daghang netizens ang nakaangay sa maong tradisyon ug adunay uban nga nagtuo nga mahimo usab kini gamiton isip simbolikong paagi sa pagpanubag sa mga opisyal nga masipyat sa ilang katungdanan.
Bisan pa man, nagpabilin kini nga usa ka kultural nga kalihokan sa Italy nga naglangkob sa kasaysayan, kataw-anan, ug pagpamatuod sa publiko pinaagi sa mamugnaong pamaagi.