Nadiskobrehan sa Department of Public Works and Highways (DPWH) ang usa ka gikaingong “tunnel” nga adunay gilawmon nga 15 metros sa Purok 2, Barangay San Jose, Malaybalay City, ug daling gipasirado alang sa kaluwasan sa publiko.
Sa pakighinabi sa Bombo Radyo Malaybalay kay Ariel Marte sa DPWH Maintenance, na matod pa bag-o pa lamang nga gihimo ang maong lungag ug wala kini nagkonektar sa bisan unsang lugar, sukwahi sa nagkaylap nga mga espekulasyon. Sa ilang gihimong inspeksyon, nakit-an sa sulod ang mga gamit sama sa electric drill (barina), extension wire, suga, ug agdanan, nga nagpaila nga gigamit kini sa wala pa matino nga kalihokan.
Dugang pa, duha ka personnel sa DPWH ang ninaog sa maong tunnel aron mag-inspeksyon ug wala nay laing nakit-ang kagamitan gawas sa mga nasangpit. Sa pagkakaron, wala pa’y pinal nga plano ang ahensya kon unsay sunod nga lakang samtang naghulat pa sa opisyal nga direktiba gikan sa ilang kadagkoan.
Nagpabiling sirado ang maong dapit ug gipahimangnoan ang publiko nga likayan ang pagduol niini aron malikayan ang bisan unsang disgrasya.