Nakabsan sa kinabuhi ang usa ka 40-anyos nga lalaki human gidunggab ug gitigbas sa Purok 2, Barangay Baclayon, Lantapan, Bukidnon sa kadlawon kagahapong adlawa.
Matud sa Lantapan Municipal Police Station, nakit-an ang biktima nga naghigda sa yuta nga adunay usa ka samad dinungggaban sa wala nga ilok ug duha ka samad sa wala nga bukton.
Gideklara kining patay sa Municipal Health Office sa Lantapan.
Base sa inisyal nga imbestigasyon, misulod matud pa ang biktima sa balay sa mga suspek samtang nagdala og sundang ug giingong gitigbas ang usa sa mga suspek, nga usa ka 36-anyos nga lalaki.
Misukol matud pa ang suspek ug ang iyang 23-anyos nga igsoon pinaagi sa pagdunggab sa biktima.
Nasamdan usab sa wala nga abaga ang usa sa mga suspek ug gidala sa Bukidnon Provincial Medical Center alang sa atensyong medikal, samtang ang usa gidala sa Lantapan MPS alang sa hustong disposisyon.
Boluntaryong misurender sa mga responding police personnel ang mga suspek, samtang ang patayng lawas sa biktima gidala sa Villanueva Funeral Homes sa Malaybalay City.