Giablihan ang unang art exhibit sa Bukidnon Museum nga nagpakita sa talagsaong talento sa lokal nga mga artista. Sumala kang Sen. Juan Miguel “Migz” F. Zubiri, nga ang maong kalihukan, nga gipahigayon sa Bukidnon Cultural Center, mao ang unang opisyal nga event sa museyo diin gipakita ang “soil paintings” sa Bukidnon Local Artist Collective (BULAC) nga gipangulohan ni Datu Waway Saway.
Bisan mubo lang ang preparasyon nga duha ka semana hangtod usa ka bulan, gipadayag nga world-class ang kalidad sa mga arte nga gihimo gamit ang lain-laing yuta gikan sa nagkadaiyang lungsod sa Bukidnon.
Gipadayag usab sa senador nga tuyo sa maong exhibit nga mapasiugda ang kultura ug tradisyon sa pito ka tribo sa lalawigan, samtang gihagit ang publiko gikan sa Cagayan de Oro ug ubang bahin sa Mindanao nga mobisita sa museyo. Plano usab nga himoon kining tinuig nga kalihukan ug kabahin sa Kaamulan Festival aron mas mapalambo pa ang industriya sa lokal nga arte.
Samtang nagpadayon, gihangyo ni Zubiri ang mga artista nga ipahulam ang ilang mga paintings alang sa permanenteng display, ilabi na kay giplano nga butangan og coffee shop ang museyo aron mahimong destinasyon sa mga biyahero ug dugang oportunidad sa pagbaligya sa ilang mga likha.