Patay ang siyam (9) ka indibidwal samtang 13 ang samdan human sa walay pili nga pagpamusil sa usa ka 13-anyos nga estudyante sa Kahramanmaras province sa southern Turkey.
Base sa imbestigasyon, misulod ang Grade 8 nga suspek sa tunghaan nga adunay dala nga mga pusil nga gituohang kini nga sa iyang amahan nga kanhing pulis.
Gisulod kini sa duha ka classroom ug nagpaulan og bala sa mga tawo sulod niini.
Gituohang lima ka pusil ug pito ka magazine ang dala niini.
Ang suspek namatay usab, apan wala pa maklaro kung kini ba nagpakamatay.
Sumala sa mga otoridad, upat sa mga nasamdan anaa sa kritikal nga kahimtang samtang unom ang naa sa intensive care unit.
Aduna usab mga estudyante nga milukso gikan sa bintana aron makalikay sa pagpamusil.
Gidakop usab sa mga otoridad ang amahan sa suspek samtang nagpadayon ang imbestigasyon sa insidente.